Maturinn er meðalið

Ég sá þessa mynd, en hún gekk á milli vina minna á Smettisskruddunni (Facebook).
Ég get ekki tekið 100% undir hana vegna þess að það er ekki hægt að alhæfa svona,
og þetta er sett svolítið svart/hvítt fram. Samt sem áður eru þarna skilaboð sem við getum
pælt í.

 

Hippókrates, faðir læknisfræðinnar, sagði "Let food be your medicine, and your medicine be your food". Þetta þýðir að það sem við borðum ætti að vera meðalið okkar, við myndum þá líklegast vilja borða eitthvað sem styrkir okkur og læknar frekar en það sem gerir okkur illt. Hann sagði líka að "Medicine should do no harm", en hefðbundin lyf í dag hafa heldur betur aukaverkanir. Ég vildi óska þess að þetta væri ennþá stefnan hjá mörgum fagstéttum í dag.

Ekki misskilja mig samt, ég er gífurlega þakklát fyrir læknavísindin og lyfjafræðina. Mér finnst bara svo rökrétt að borða þann mat sem hressir mann og styrkir og að það sem ég læt ofan í mig hafi bein áhrif á líkamsstarfsemina.

 

Heilbrigði kemur í veg fyrir krabbamein

Meira um hamp fræ...

Ótrúlega næringarrík fræ, furðurleg samt hvað Ísland er oft langt á eftir samtímanum...

Eftirfarandi skrifaði ég  6.9.2011

Í dag var ég að kynna mér Hamp fræ, afurð sem er ekki mjög þekkt á Íslandi. Hamp fræ eru fræ plöntunar Cannabis Sativa. Þetta er sama tegund og Maríjuana er framleitt úr en annað afbrigði. Hamp fræin eru mjög próteinrík og hafa verið kölluð „næringarlega fullkomnasta fæðan“. Prótein eru úr amínósýrum og það er merkilegt að þessi hamp fræ innihalda 18 af 20 amínósýrunum sem eru byggingareiningar próteina og þær innihalda þær 10 lífsnauðsynlegu sem líkaminn okkar framleiðir ekki sjálfur. Próteinin í hampi eru svo góð því að líkaminn vinnur auðveldlega úr þeim. Edestin er globulin prótein sem maður finnur mikið af í fræjunum. Edestin er sagt bæta meltinguna .

Það sem mikið hefur verið talað um í Hamp fræjum eru hollu fitusýrurnar. Hamp fræ eru sögð hafa eitt besta hlutfall sem hentar manninum af fitusýrum. Omega3,6 og GLA. Það er líka E vítamín í þessum fræjum.

Hampfræ eiga líka stuðla að: Lækkun blóðþrýstings. Lækkun LDL kólestrólmagns. Minnkun bólgna og vera góð við gigtareinkennum. Aukinni orku og betri meltingu.

Efnin í Hampfræjum eiga líka að vera góð fyrir þurrt skinn og vera góð fyrir hárið.Þegar litið er á amínósýrurnar í Hampfræjum þá hefur verið sagt að þetta sé nánast fullkomin afurð til að fá prótein. Fræin innihalda allar amínósýrur sem líkaminn þarf. Önnur næringarefni í fræjunum eru magnesíum, C-vítamín, beta-karótín, kalk, trefjar, járn, B1 vítamín, B2 vítamín, B3 vítamín, zinc, kopar, manganese, chlorophyll og phytosterol (lækkar kólestról!)

Ég hef bara rétt aðeins kynnt mér næringargildi Hampfræja en það sem mér finnst mest spennandi er bara hvað þau eru góð á bragðið. Ég sá þau fyrst þegar ég var úti í Kanada, en þar er leyfilegt að rækta þau. Þetta eru ekki ódýr fræ en þau eru ræktuð undir mjög ströngu eftirliti. Þetta er ótrúlega spennandi afurð og sérstaklega fyrir þá sem vilja ekki drekka kúamjólk.

Við erum nefnilega farin að búa til Hamp mjólk úr þessum fræjum. Það er mjög einfalt og ég læt uppskriftina fylgja með. Það er mikil fita í fræjunum (holl fita sem er nauðsynleg) og þegar maður býr mjólkina til þá fær maður svona frekar þykka, rjómakennda mjólk. Þetta er nánast eins og að vera með mjólkurhristing úti á morgunkorninu. Hún er svo góð að maður getur drukkið hana eintóma og það er enn betra að bæta nokkrum berjum eða ávöxtum við. Ég hef séð hamp fræ (Hemp seeds) til sölu hér á landi, þá örugglega í heilsubúðum/heilsuhornum. Við keyptum okkar í Kanada. Ég er alveg orðin háð þessari mjólk. Samt get ég lofað að það er ekkert maríjúana í henni, ég er ekki háð henni í þeim skilningi. ;)

Hér er uppskriftin:
1 bolli hampfræ
5 döðlur
örlítið salt
vanilla/vanillusykur/vanillusýróp
1 bolli vatn

Þetta er allt sett í blandara og þegar það er nokkuð vel þeytt þá bætir maður meiru vatni við. Samanlagt á þetta að gera u.þ.b. 1700ml af mjólk.

Endilega prófið þetta, sérstaklega ef ykkur langar að minnka kúamjólkurneyslu, eruð vegan eða með mjólkuróþol.

Ég vil minna aftur á að þetta eru allt upplýsingar sem ég er að afla mér í gegnum heimildir og eiga eingöngu að vera til fræðslu. Ég er ekki með doktorspróf í hemp fræjum svo ég gef mér smá +- frávik fyrir mannleg mistök, en á heildina litið líst mér ótrúlega vel á þessa vöru!

Ég studdist við :
Wikipedia greinar um Hamp mjólk og hamp. http://www.ratical.com/renewables/hempseed1.html
Grein um Hamp olíu sem Dr.Weil, MD frá Harvard skrifaði.
http://www.thenourishinggourmet.com/2009/03/hemp-seed-nutritional-value-and-thoughts.html
Hemp Seed: The most Nutritionally complete food source in the worlds: Hemp Line Journal, July-August 1992, pp. 14-15, Vol. I No. 1

 

Ofurfæða sem kemur úr sömu átt og kannabis

Eitt epli á dag...

...kemur heilsunni í lag. Eða "An apple a day keeps the doctor away". Þetta getur varla verið rétt, eða hvað? Þau eru allavega góð gegn ýmsum kvillum. Þ.á.m. hafa efnin í eplum þá eiginleika að vera: þvagræsandi, kólestróllækkandi, blóðfitulækkandi, andoxunarefni, og þau vinna á móti bæði niðurgangi og harðlífi.

• Meira en 40 milljón tonn af eplum eru ræktuð á hverju ári.

• Epli eru í 4. sæti af mest framleiddu ávöxtum í heiminum.

• Eplin eru auðveld í matreiðslu, fara vel með nánast hverju sem er og eru mjög góð fyrir okkur.

Sykrur í eplum eru aðallega frúktósi og þess vegna mega sykursjúkir borða þau.  Þau innihalda mjög lítið af próteinum og fitu. Meðal vítamína í eplum eru C og E, og af steinefnum eru m.a. pótassíum og járn,.

Í 100g af hráu epli fær maður 11% af þeim trefjum sem maður þarf yfir daginn. Stærstur hluti trefjanna í eplum eru pektín. Pektín eru  trefjar sem leysast ekki upp. Þær draga í sig vökva og ýmisleg eiturefni og annan úrgang sem þær taka með sér út úr líkamanum og ofan í skólpræsikerfi borgarinnar.  

Lífrænar sýrur í eplum endurnýja normalflóruna í þörmunum og varna þannig gegn gerjum í þörmunum.

Tannín (barksýra). Epli er einn þeirra ávaxta sem er hvað ríkastur af tanníni. Tannín eru bólgueyðandi.

Boron hefur verið lítið rannsakað en það er frumefni sem finnst í eplum. Rannsóknir benda til þess að boron vinni með kalki og magnesíum í líkamanum og getur óbeint komið í veg fyrir beinþynningu.

Epli jafna út blóðþrýsting, hvort sem hann er of hár eða of lágur.

Lifrin og krónískt exem af völdum eiturefna.
Epli draga í sig eiturefni úr smáþörmunum, og auðvelda þar með hreinsun blóðsins og húðarinnar. Epli hjálpa til við að losa harðlífi og  stuðla að hreinsun lifrarinnar sem annars, ef full af eiturefnum getur valdið húðvandamálum.

Hátt kólesteról og æðakölkun
Epli lækka kólesteról  og koma í veg fyrir æðakölkun.  Það hefur sýnt sig að það að borða 2-3 epli á dag í nokkra mánuði dregur verulega úr kólestrólinu (þá er líka skynsamlegt að halda sig frá því sem hækkar kólestrólið).

Krabbamein í ristli
Rannsókn sem var framkvæmd í Japan sýndi fram á að epli borðuð í miklum mæli geti hjálpað við að hindra vöxt á fjölgun krabbameinsfruma í ristli.

En það er svo leiðinlegt að borða epli.

• Hrá:  Mælt er með því að skræla epli vegna þess, að það er lítið magn af trefjum og vítamínum í hýðinu. Svo er allskonar efnum og gljáa sprautað á eplin til þess að þau líti vel út lengur. Svo er hýðið ekki eins auðvelt í meltingu.
• Eplamauk: Það er svo gott á bragðið og svo er það tilvalið fyrir lítil börn og þá sem hafa litla matarlyst vegna veikinda eða öldrunar. Svo er það bara svo gott út á grauta og ofan á brauð.
• Bökuð epli eru yndislega góð og það er jafnvel hægt að strá smá kanil ofan á þau.
• Soðin epli eru líka mjög góð, og það er hægt að stappa þau í eplamauk.
• Safi: Það er ekki slæm hugmynd að setja epli í safapressuna upp á tilbreytingu.

 Upplýsingar úr Healthy Foods eftir George D. Pamplona-Roger, læknir, skurðlæknir og prófessor í næringarfræði. 

Lárperan er vanmetin

Myndi þig ekki langa til þess að borða eitthvað sem gefur þér A,C,D,E og K vítamín og kannski líka B vítamínin (thiamín, níacin, biotin, pantothenic sýru, B-6, B-12 og fólat. Væri ekki æðislegt ef þessi ávöxtur innihéldi líka Kalíum (potassium), kalk, fosfór, sink, járn og kopar fyrir blóðið,  Lutein (mikilvægt fyrir augnheilsu) og magnesíum .

Ef svarið er „jú, að sjálfsögðu“ þá erum við í sama báti. Góðu fréttirnar eru þær að lárpera (avocado) inniheldur allt þetta.  Í þokkabót er hún líka svo fallega græn, mjúk og góð á bragðið.

Lárpera (avocado) er ávöxtur, ekki grænmeti en það skiptir svo sem engu máli.

Efni í lárperunni stuðla að lækkun LDL kólestrólsin.

Eins og kom fram hér þá hjálpar avocado við að koma reglu á blóðþrýstinginn.

Nú hvernig borða ég þá avocado?

Þau eru venjulega hörð þegar maður kaupir þau úti í búð, þessi í grænu netunum eru oftast mjög fín. Þau þurfa venjulega að standa við stofuhita í nokkra daga áður en þau eru tilbúin. Þau eru orðin góð þegar þau eru farin að gefa eftir þegar maður kemur við þau. Þetta kemur með reynslunni, maður opnar etv. nokkur avocado of snemma eða of seint en fær þetta síðan á tilfinninguna. Lárperan er skorin í tvennt og innihaldið skafið úr. Ef avocadoið er brúnt þá er það ónýtt en ef það eru bara nokkrir brúnir deplar eða blettir þá má bara skera þá frá. Ekki geyma lárperu nálægt eplum, þá skemmast þau hraðar.

Ég tók meira að segja mynd fyrir ykkur til þess að sýna ykkur hvað lárperurnar eru fallegar!

Hægt er að borða lárperur eintómar, ofan á ristað brauð, með salati, sem ídýfu, með baunaréttum... endalausir möguleikar.

Guacamole

Guacamole er mjög vinsælt og mjög einfalt og gott. Það má stappa allt saman eða setja í blandara.

Innihald úr 1 frekar stóru vel þroskuðu avocado
1-2 hvítlauksrif
smá sítrónusafi (úr ferskri sítrónu að sjálfsögðu)
salt eftir smekk

Sumir vilja líka tómat í, sílantró, pipar eða e-ð annað. Það má setja hvað sem manni dettur í hug.

Barnamatur

1 avocado + 1 banani  = stappað saman.

Mjög einfalt, mjúkt, bragðgott, gífurlega auðmeltanlegt, inniheldur mikilvægar hollar fitusýrur og önnur næringarefni sem að mömmur vilja að börnin sín fái. Þetta var uppáhalds barnamaturinn minn og ég verð að játa að ég borða þetta enn í dag!

Gangi ykkur vel að prófa ykkur áfram!

Upplýsingar frá avocado.org, avocado.com og mömmu reynslubolta þegar það kemur að barnamat.

Ekki henda steininum

Þögli morðinginn

Of hár blóðþrýstingur eða „hypertension“ hefur oft verið nefndur „the silent killer“  eða þögli morðinginn því að einkennin koma ekki alltaf greinilega í ljós. Mennskja sem virðist vera við hestaheilsu getur verið með of háan blóðþrýsting. 90% af tilfellum of hás blóðþrýstings eru ekki af völdum annarra sjúkdóma. „Slæmt“ matarræði getur valdið háþrýstingi.  Það merkilega er að það er til matur sem hjálpar við að lækka blóðþrýstinginn og halda honum jöfnum. Það er einnig hægt  að lækka blóðþrýstinginn með því að forðast mat sem stuðlar að hækkun blóðþrýstings. Hljómar einfalt og rökrétt, ekki satt?

Hvað getur hjálpað við að slá á háþrýsting?

• Drekktu mikið vatn, það þynnir blóðið.

• Trefjarík fæða er góð:  grænmeti, ávextir, hnetur (ósaltaðar n.b. jarðhnetur eru ekki hnetur!) og heilkorn. Þessir fæðuflokkar eiga ekki að valda of háum blóðþrýstingi.

• Ávextir og grænmeti sem eru rík af kalíum (potassium). Kalíum hjálpar líkamanum að losa sig við óþarfa salt. Sem dæmi má nefna papaya, fíkjur, banana, og sveskjur.

• Hvítlaukur jafnar út blóðþrýsting, hvort sem hann er of hár eða of lágur.

• GSE – grapeseed extract (fyrir þá sem kannast við góðgætið)

• Tómatar, laukur og sellerí ásamt hvítlauk draga úr háþrýstingi og hjálpa til við að styrkja hjartavöðvann.

• Spergilkál (brokkolí), gulrætur, hvítkál, blómkál, kartöflur (með hýði), lárpera (avocado), appelsína, greipaldin og ferskjur eru einstaklega hjálpleg þegar koma á í veg fyrir að ákveðin efni setjist á æðaveggi og smám saman leiði til stíflunar kransæða.

• Skortur á D-vítamíni hefur verið tengdur við of háan blóðþrýsting.

• Cayenne pipar lækkar blóðþrýsting.

Hvað ætti ég að forðast þegar ég reyni að ná blóðþrýstingnum niður?

• Ekki nota of mikið salt. Salt er ekki bara salt, það leynist úti um allt ekki gleyma matarsódanum, soya sósunni, gervisykri og rotvarnarefnum. Mjólkurvörur innihalda oft mikið salt/sodium.

• Slepptu kjöti þá sérstaklega reyktum og unnum kjötvörum eins og beikoni, pylsum, skinku, kjötáleggjum og niðursoðnum fiski (t.d. túnfiski og sardínum).

• Áfengi er alveg no - no.

Regluleg hreyfing (t.d. göngur, sund og önnur líkamsrækt) er mikilvæg til þess að viðhalda heilbrigðu hjarta- og æðakerfi.

Þessi stutta samantekt er einungis ætluð til fræðslu og á ekki að koma í staðinn fyrir læknisráðgjöf. Hinsvegar get ég sagt ykkur ótal sögur um konur og karla sem fóru eftir þessum einföldu ráðum og losnuðu við öll merki um háþrýsting.

Upplýsingarnar og ráðin eru fengin úr „Natural Remedies Encyclopedia“  sem Vance Ferrell og Harold M. Cherne, M.D. skrifuðu og tóku saman. Bókin er 1000 blaðsíðna hlunkur sem kann ráð við öllu.

"Góðgætið" sem leynist í verslunum landsins.

Ég er mætt í skólann og þarf að fara að læra en ég rakst á þessa mynd í morgun. Hún er svolítið fyndin vegna þess að við vitum að það er sannleikur í þessu.  Myndin skýrir sig sjálf.

"Mjólk er góð"... eða hvað?

Þessi pistill var skrifaður í tengslum við frétt sem birtist á Mbl.

Niðurstöður Jóhönnu koma ekki á óvart. Mjólkurneysla hefur oft verið tengd við krabbamein. Athyglisvert fannst mér þó að "fáar rannsóknir eru til um tengsl næringar á fyrri æviskeiðum og áhættu á krabbameini síðar á ævinni". Ég hefði haldið að það fyrsta sem menn myndu vilja rannsaka er hvort það sem sett er inn í líkamann hafi áhrif á starfsemi hans og þá hvort það að setja inn óæskilega fæðu gæti valdið truflunum í eðlilegri starfsemi.

"The China Study" er umfangsmesta rannsókn í næringarfræði sem hefur verið framkvæmd. Í samnefndri bók er fjallað um rannsóknina en bókina skrifuðu feðgar, sonurinn er læknir og faðirinn er prófessor í næringarfræðilegri lífefnafræði. Faðirinn var einn þeirra sem stóðu að rannsókninni sem stóð yfir í um 20 ár. Bókin sem þeir gáfu út er mest selda bók í Bandaríkjunum um matarræði/næringarfræði. 

Í mjög stuttu máli er niðurstaða rannsóknarinnar sú að fólk sem neytir fæðu sem inniheldur hátt hlutfall dýraafurða er líklegra til að fá króníska sjúkdóma. En þeir sem borðuðu grænmetisfæði voru minna líklegir til þess að fá þessa sömu sjúkdóma. 

Niðurstaða höfunda var sú að fólk sem er vegan (eða sneiðir hjá dýraafurðum eins og nautakjöti, svínakjöti, fuglum, fiskum, eggjum, osti og mjólk) geti minnkað eða jafnvel snúið við myndun krónískra sjúkdóma.

Það eru margir að átta sig á þessum sláandi niðurstöðum og það er margt fólk sem hefur nýtt sér þessa þekkingu og breytt um matarræði. Nú er orðið vel þekkt að fólk með sykursýki II geti losnað af lyfjum og eins hafa einstaklingar með sykursýki I losnað af insúlíni með því að breyta um matarræði. Það er ekki eins algengt en það er hægt.

Eitt nýlegt og frægt dæmi er um Bill Clinton en hann skipti algjörlega um lífstíl eftir hjartaaðgerð. Hann þráði að lifa lengur til þess að geta séð barnabörnin vaxa úr grasi.

 Ég setti myndband af youtube með en þar er viðtal við einn af höfundum "The China Study" og svo er viðtal við höfund nýlegrar bókar. Hann hefur rannsakað mjólk mikið. Hann leiðréttir þá langlífu mýtu um að mjólk sé góð fyrir beinin. Svo er loks úrklippa úr viðtali við Bill Clinton.

 

P.s. þeir sem hafa áhuga á að lesa meira um "The China Study" geta séð útdrátt úr bókinni hér : http://thechinastudy.com/PDFs/ChinaStudy_Excerpt.pdf  

Feitur, sjúkur og næstum dauður.

Hvað geta verið ánægjulegri fréttir en þær að við getum haft eitthvað að segja um heilsuna okkar? Getur kannski verið að okkur finnist stundum "þægilegra" að halda að sjúkdómar séu allir einfaldlega af völdum gena og að við getum ekkert við þeim gert? Við getum þá bara haldið áfram með okkar venjulega líf og þurfum engu að breyta, bíðum bara eftir að vísindamenn finni töfralausn á vandanum. 

Ég er á þeirri skoðun að það sem við setjum ofaní okkur geti ekki annað en haft áhrif á líkamann og líðan. 

Bróðir minn var að segja mér frá heimildarmynd sem hann sá fyrr á þessu ári. FAT, SICK AND NEARLY DEAD. Ég setti "trailerinn" hér fyrir neðan.

Myndin fjallar um mann sem var allt of þungur (140kg). Í kjölfar offitunar var hann búinn að fá sjálfsónæmissjúkdóm. Hann var á allskonar lyfjum gegn ýmsum kvillum sem hrjáðu hann. Hann var í bráðri hættu á að fá hjartaáfall og hann sá að lyfin voru bara skammtímalausnir.

Hann ákvað að taka á rót vandamálsins, sem var greinilega lífstíll hans og hann ákvað að taka sig á og hreinsa allt kerfið. Hann ráðfærði sig við næringarfræðinga og ákvað að fara á 60 daga safakúr og hann ferðaðist um Bandaríkin á sama tíma. Hann var undir eftirliti lækna til að fylgjast með árangrinum. 

Á þessum 60 dögum náði hann að losna af öllum lyfjum og sjálfsónæmið hætti að gera vart við sig. Eftir að hafa upplifað svona mikla breytingu og finna fyrir betri líðan fór hann að sjálfsögðu ekki tilbaka í gamla lífstílinn. Hann er grænmetisæta í dag og hreyfir sig reglulega.

Það sem ég er að reyna að segja er að það er fagnaðarefni að geta komið í veg fyrir óþarfa óþægindi og sjúkdóma með lífstílsbreytingum. Það er ekki of seint að byrja í dag að taka sig á. Það þarf ekki að vera flókið að breyta um lífstíl. Lausnin er venjulega einfaldari en við viljum hafa hana.

Það eru alveg að koma áramót og það er tilvalið að byrja að undirbúa áramótaheit :)

Kveðja,

Elísa

 

 

 P.s. Til að fyrirbyggja misskilning þá byggist safakúr á því að drekka ferska pressaða ávexti og grænmeti. Safarnir eru mjög næringarríkir og safakúr er oft notaður fyrir afeitrun líkamans. 60 daga safakúrs er frekar langur og er e.t.v. ekki lausnin fyrir alla. Það var tíminn sem þurfti fyrir þennan einstaklings því ástand hans var svo slæmt. Safarnir eru ekki "fernusafar" sem eru keyptir út í búð. Ef þið hafið áhuga á að fara á safakúr er sniðugt að leita sér frekari upplýsingar áður maður byrjar. 

Lífsstílsþættir orsök 40% krabbameina

Lakkrís er jurt

Það er gaman að sjá Önnu Rósu gefa út bók um jurtir, enda er það hennar sérgrein. Mamma fékk nýlega svakalegan áhuga á því að tína jurtir og búrið okkar er fullt af krukkum með þurrkuðum jurtum og hún getur núna galdrað fram jurtaseyði við hinu og þessu.

Þegar ég var lítil var mamma svo sniðug að gefa okkur systkinunum aldrei óhollt nammi eins og súkkulaði, hlaup, karamellur og samskonar sykur jukk. Í staðinn leitaði hún að nammi sem var bæði hollt og gott. Að sjálfsögðu læra börn bara að borða það sem þeim er gefið og þess vegna tókum við varla eftir þessu. Eitt af því sem hún uppgötvaði er apótekara lakkrís. Við erum vön því að tala um lakkrísrúllur og lakkrís toppa og því hljómar lakkrís ekki mjög hollur. En þessi svokallaði apótekara lakkrís er alveg hreinn lakkrís og það kom mér á óvart þegar ég fór að lesa mig til um jurtir að ég skuli hafa rekist á lakkrís. Hreinn lakkrís er jú jurt og hann er notaður til lækninga gegn mörgum kvillum. Lakkrís er sérstaklega áberandi í austurlenskum lækningum.

Náttúrulegur lakkrís hefur ótal eiginleika og svo er hann líka svo góður á bragðið:

• ·         Lakkrís virkar eins og bólgueiðandi steri.

• ·         Lakkrís er talinn auka framleiðslu taugaboðefna.

• ·         Lakkrís hefur sveppaeyðandi árif ásamt því að vera bakteríu drepandi og getur því nýst í baráttu við sýkingar.

• ·         Lakkrís hjálpar til við að koma jafnvægi á blóð sykurinn.

• ·         Lakkrís  bætir vefi meltingarvegsins

• ·         Lakkrís hreinsar blóðið og afeitrar

• ·         Lakkrís kemur jafnvægi á blóðsykur og hefur verið notaður við sykursýki.

• ·         Lakkrís er eitt algengasta náttúrulyf notað við gyllinæð.

• ·         Lakkrís hjápar til við að koma sýrum í maganum í jafnvægi, er góður við bakflæði.

• ·         Lakkrís er talinn hafa góð áhrif á magasár.

Nú er vetur og flensur eru að ganga, lakkrís rót er einmitt talin hjálpa mikið við kvefi of hósta og hann losar slím frá lungum og öndunarvegi.

Lakkrís er m.a. talinn hafa jákvæð áhrif á astma, skalla, flösu, þunglyndi, veirusýkingar, lifrina og psoriasis.

Ég ætla samt að vara ykkur við því að lakkrís er milt hægðarlyf og því skal fara varlega, þó hann sé svona hollur þá er óþarfi að klára heila dollu.

Ekki nota þessa stuttu samantekt til þess að réttlæta lakkrís nammis át í jólafríinu. Lakkrís eins og við þekkjum hann flest þ.e. í formi sælgætis er fullur af sykri, gelatíni og allskyns bragðefnum. Mikið af honum er meira segja bragðbættur með anís, því það er ódýrara en alvöru lakkrís.

 

Ég vil minna aftur á að þetta eru allt upplýsingar sem ég er að afla mér í gegnum heimildir og eiga eingöngu að vera til fræðslu.

Meira á HerbWisdom.com & Nutritional Supplement Educational Centre.com

Notaðu náttúruna til að bæta líf þitt

Linsubaunir - uppskrift & fróðleiksmolar

Linsur eru mjög „concentreraðar“, aðeins 11,2% af þyngd þeirra er vatn.  Þetta gerir þær að einstökum orkubrunni sem gefur 338 Kal/100 gr.  Mest af þessari orku eru prótein og kolvetni því linsur innihalda nánast enga fitu (minna en 1 %). Þær eru mjög járn – og trefjaríkar.

100 gr a þurrum linsum (sem er nóg í einn stóran skammt eða tvo litla) uppfyllir eða nær langt í að uppfylla daglega næringarþörf  fullorðins kalrmanns af eftirfarandi efnum:  

·         Prótein (28,1 gr) meira en helmingur af ráðlagðum dagsskammti (53%)

·         Trefjar (30,5 gr) uppfyllir 125 % af ráðlagðum dagsskammti

·         B1 vítamín  (0,475 mg)  nánast 1/3   (32%)

·         B6 vítamín  (0,535 mg) meira en ¼  (27 %)

·         Fólín  (433 mg)  meira en tvöfaldur ráðlagður dagsskammtur  (216 %)

·         Magnesíum (107) mg  nánast 1/3  (32 %)

·         Járn (9 mg)  (90 %)

·         Pótassíum  (915 mg) nánast helmingur (45%)

·         Sínk  (3,61 mg) nánast ¼  (24%)

·         Kopar (0.852 mg) meira en helmingur (57 %)

Allt þetta finnst í einum skammti af linsum. Það er engin furða að Esaú hafi selt bróður sínum frumburðarréttinn fyrir svona næringarríkan baunarétt.

Linsur eru góðar við blóðleysi, harðlífi, sykursýki, háu kólesteroli og þar sem þær eru ríkar af járni, trefjum og fólín eru þær tilvaldar fyrir barnshafandi konur.

Þó svo að linsur séu næringarríkar, þá eru önnur efni sem þær innihalda ekki eins og A,C og E vítamín, Kalk, B12 og linsubaunir innihalda nánast enga fitu. Þetta á við flesta fæðu, það er sjaldgæft að finna einn ákveðinn ávöxt eða hvað það nú er sem inniheldur allt sem við þurfum. Þess vegna er sniðugt þegar verið er að elda, að velja meðlæti sem bætir upp það sem aðalrétturinn hefur ekki.

Dæmi um það væri að bera t.d. brún hrísgrjón fram með linsum þar sem þau innihalda methionine, sem er lífsnauðsynleg amínósýra sem finnst ekki í linsubaunum. Athyglisvert fannst mér samt að spíraðar linsur innihalda allar nauðsynlegu amínósýrurnar! Sítrónusafi er líka góður þar sem hann auðveldar upptöku járns og er þar að auki bragðaukandi. Kál og spínat er tilvalið með í réttinn þar sem það er ríkt af kalki og svo gulrætur sem eru mjög A-vítamín ríkar.

Ég læt uppskrift fylgja af linsubaunarétt sem heitir Mazidra sem er í mjög miklu uppáhaldi hjá mér.  Við notum venjulega French green/puy linsur sem eru grænbrúnar en það má líka nota venjulegar brúnar.

Mazidra

3 b. Vatn
1 b. Linsubaunir
1. Saxaður laukur
1 hvítlauksrif
1 lárviðarlauf
1/8 tsk timían
salt

Allt sett í pott. Þegar suðan er komin upp má lækka hitann og láta malla í 30-45 mín, eða þangað til linsubaunirnar eru orðnar mjúkar (samt ekki maukaðar).

Þetta borðum við svo með brúnum hrísgrjónum og salati, t.d. tómata, agúrkur, papriku, grænkál, spínat eða bara það sem er til. Persónulega finnst mér rétturinn ekki vera „rétt“ framreiddur ef það er ekki sítrónusósa með. Það er auðvelt að búa hana til, maður blandar bara sítrónusafa við ólífuolíu og nokkur hvítlauksrif. Sítrónan dregur fram góða bragðið ;)

Það er auðvelt að elda linsubaunir, því ólíkt mörgum baunategundum, þarf ekki að leggja þær í bleyti áður. Þetta er miklu einfaldara en það virðist, endilega bara prófa sig áfram! :) Gangi ykkur vel.

Staðreyndir um linsubaunir: Healthy Foods   eftir George D. Pamplona-Roger, M.D.  bls. 130, 135.